Sêstu insegnant e volaressistu insegnâ ai tiei arlêfs une danze semplice? Sêstu apassionât di tradizions e musiche popolâr e volaressistu imparâ une coreografie facile facile? Ti presentìn une tra lis plui cognossudis in Friûl e no dome, eseguide de orchestre dal Grup Folcloristic Pasian di Prât tant che “I siet pas”. “I siet pas” e je une cjançon a bal che un timp e vignive doprade par insegnâ ai fruts a cjantâ fin a siet, une vore cognossude ancje intune aree che e cjape dentri Friûl, Istrie, Austrie, Baviere.

Ve ca une biele regjistrazion de danze e de cjançonute. Al sarà necessari scoltâle ben la regjistrazion par capî benon come che e je dividude e come che si ripet la danze che o larìn a presentâ.

COREOGRAFIE DAI SIET PAS

La coreografie e je componude di trê moviments che si ripetin dôs voltis (la seconde volte e ven cjantade). Lis cubiis si metin in cercli cu lis feminis a man drete dal om e al esterni dal cercli stes, in mût che i balarins a podedin procedi in sens antiorari. Lôr si tegnin par man: la frute e met la sô manute a çampe su la man diestre dal frut; invezit chê altre man e va poiade al flanc par ducj i doi.

MOVIMENT A

1) Dilunc la prime frase musicâl “Un, doi, trê, cuatri, cinc, sîs, siet” il frut e la frute a van indenant par siet pas a timp di musiche, partint cul pît diestri la frute e il pît sinistr il frut;

2) Dilunc la seconde frase musicâl “Un, doi, trê, cuatri, cinc, sîs, siet”, il frut e la frute a fasin siet pas indaûr a timp di musiche;

3) Inte tierce frase musicâl “Un, doi, trê” il frut al fâs doi pas laterâi viers il centri dal cercli, tal stes moment la frute e fâs invezit doi pas laterâi viers l’esterni dal cercli.

4) Po dopo inte cuarte frase musicâl “Un, doi, trê” frut e frute a fasin di gnûf doi pas par svicinâsi.

5) La cuinte frase musicâl “Bambinute ven cun me” la cubie si da la man diestre fasint un zîr complet su se stes, partint cul pît diestri in sens orari tornant inte posizion iniziâl.

Cumò si tornin a ripeti i moviments 3 – 4 – 5.

Il moviment A cumò si torne a fâ inte stesse maniere che o vin pene viodût ma cheste volte ancje cjantant la cjançonute da “I siet pas”.

 

MOVIMENT B

1) Dilunc la prime frase musicâl “Un, doi, trê, cuatri, cinc, sîs, siet”, il frut e la frute a van indevant di siet pas a timp di musiche, partint cul pît diestri la frute e cul pît a çampe il frutin.

2) Dilunc la seconde frase musicâl “Un, doi, trê, cuatri, cinc, sîs, siet” , il frut e la frute a fasin siet pas indaûr a timp di musiche.

2) Dilunc la seconde frase musicâl “Un, doi, trê, cuatri, cinc, sîs, siet” , il frut e la frute a fasin siet pas indaûr a timp di musiche.

3) Dilunc la tierce frase musicâl “Un, doi, trê” la femenute e fâs un piçul pas cul pît diestri viers l’esterni dal cercli par incrosâ la gjambe a çampe metintle devant a chê a drete. Il frut invezit, tal stes moment al fâs il moviment come se al fos tal spieli e duncje: al fâs un piçul passut cul pît a çampe viers il centri dal cercli e po al incrose la gjambe a drete metintle denant di chê çampe.

4) Dilunc la frase musicâl “Un, doi, trê” si fâs il stes moviment dal pont trê, ma tal sens contrari, svicinantsi di pôc.
5) Dilunc la frase musicâl “Bambinute ven cun me” frut e frute si dan la man diestre e la frute e zire sot il so braç viers diestre, in 4 timps.

Cumò si ripetin i moviments 3 – 4 – 5.

Il moviment B cumò si torne a fâ inte stesse maniere che o vin pene viodût ma cheste volte ancje cjantant la cjançonute da “I siet pas”.

 

MOVIMENT C

1) Dilunc la prime frase musicâl “Un, doi, trê, cuatri, cinc, sîs, siet” il frut e la frute a van indenant a tip di musiche, partint cul pît a drete la frute, e il pît a çampe il frut.

 

2) dilunc la seconde frase musicâl “Un, doi, trê, cuatri, cinc, sîs, siet”:il frut e la frute a fasin siet pas indenant e po siet pas indaûr a timp di musiche.

3) dilunc la tierce frase musicâl “Un, doi, trê” frut e frute a fasin trê pas indevant;

4) dilunc la frase musicâl “Un, doi, trê” frut e frute a fasin trê pas indaûr;

5) dilunc la frase musicâl “Bambinute ven cun me” dutis lis cubiis di disponin un devant di chel altri, cul frut cul la schene viers il centri dal cercli e la frute cu la schene cu la schene viers l’esterni dal cercli e a batin lis mans dôs voltis su lis cuessis dilunc il BAM-BI, po dopo si batin lis mans dôs voltis tra di lôr par segnâ il NU-TE e par trê voltis lis dôs mans de frute a batin su lis dôs mans dal frut par segnâ VEN- CUN- ME.

Cumò si ripetin di moviments 3 – 4 – 5.

Il moviment C cumò si torne a fâ inte stesse maniere che o vin pene viodût ma cheste volte ancje cjantant la cjançonute da “I siet pas”.

Par cure di Daria Miani.