Si sintin ancjemò a sunâ, tant che il cipament dai ucieluts in Primevere, lis scjassosis batudis di man che a àn compagnât il nestri grup dilunc la esibizion al “Green Park” di Pasian di Prât. Bentornade Primevere al è un apontament nassût par festezâ la zornade nazionâl de musiche popolâr e finît par coinvolzi i numerôs spetatôrs che a àn passât un daspò misdì di fûr insiemi al nestri sodalizi.
Un spetacul gnûf, articolât in cuatri tapis, pensât par meti in lûs lis diviersis diamantaduris no dome dal parc comunâl, ma ancje dal nestri grup. Ve, di fat, che aes solitis danzis e tocs musicâi, che si son zontâts moments di poesie e di cjants carateristics de nestre tradizion.
I components dal grup si son mostrâts inte version corâl interpretant melodiis di famôs autôrs furlans e si son identificâts intai protagoniscj dai componiments poetics, recitant cun estri i viers di “La gnot di Avrîl”, “Flôr di cise”, “Rosespine”, “A une fantacine bionde” e de inedite “Primevere par ducj” scrite pe ocasion di Enzo Driussi, No son mancjâts dut câs ancje i spazis dedicâts ai bai e aes musichis tipics dal nestri repertori. Il public, daspò vê seguide la esibizion dal grup, al à concludût intal miôr mût une zornade passade in ligrie de stagjon di Vierte, concentrade inte atmosfere dal parc di Pasian.
La manifestazion Bentornade Primevere no à viodût dome la sole edizion dal 2009, ma e je stade riproponude in altris edizions dal 2016. Cun cadence anuâl, simpri tal mês di Mai, e ven presentade dal grup di Pasian intune vieste gnove in graciis de colaborazion dai fantats des scuelis dal teritori li che o colaborìn cun costance di oltri 30 agns. La finalitât dal nestri lavôr tes scuelis e je la divulgazion des tradizions popolârs furlanis, lavôr puartât indevant cun grande passion e impegn di bande di un gruput di nestris balarinis che ur va il nestri ringraciament pe ativitât davuelte e pal timp che e i dedichin. Lis resintis edizions di Bentornade Primevere a puartin indevant la idee de prime edizion dal 2009, ven a stâi di festezâ la vignude de biele stagjon ma, dilunc il spetacul, a son stâts inserîts ancje i arlêfs des scuelis che a àn podût meti in pratiche lis robis imparadis a mieç dai nestris intervents dilunc l’an.
