Il patrimoni des danzis dal nestri sodalizi al è il risultât di agns di ricercje costante e al rapresente la ricjece culturâl che pal Grup al è un motîf di braùre. Dal nestri repertori, che in dì di vuê al svante une ventine di bai, a fasin part danzis di plui antighe tradizion e coreografiis di composizion plui resinte. Tra i bai popolârs des origjins arcaichis o ricuardìn TINTINE TINTONE, LA ZIGUZAINE, I SIET PAS cun figurazions che a son compagnadis di filastrocjis ritmadis cun tescj sempliçs e ripetitîfs e la FURLANA, che intai siei zîrs graciâts, e rapresente il poeme dal amôr, scomençant dal berdei dal prin incuintri, par finî cuntune declarazion di amôr.

La Musiche de “Furlana” proponude dal nestri Grup e je stade esumade dal Mestri Bidas ae fin dal 1700 inte zone di Cividât, invezit la coreografie e je stade tornade a cjapâ, su la fonde di chê proponude dal Grup Folcloristic “I cantori del Friuli” direzût dal Mestri Luigi Garzoni, in ativitât fin ai agns ’50. Chest bal al è il prin di une schirie di danzis rapresentativis de nestre regjon, ognidune e rive di un grup furlan, che la A.G.F.F. (Associazion Grups Folcloristics Furlans) e à adotât come repertori, fasintlu deventâ patrimoni culturâl di ducj i sodalizis che a fasin part de Associazion. Di fat dal gurizan e rive la STAIARE, une danze di cort; de zone di Avian e rive la simpatiche LAVANDERE li che si conte, mimant, il moment li che l’inamorât al cîr di concuistâ la amade fasint il “gjalut” ator ator di jê intant che jê e je daûr a lavâ la blancjarie; dal comprensori di Buie la vivarose ARMONICHE E LIRON, invezit de zone di Magnan in Riviere un bal carateristic de Val dal Tor: LA SCLAVE DE TOR.

A fasin part dal nestri repertori LA TOROTOTELE, dedicade ai “torototei”, i contestoriis che a ziravin pe Italie setentrionâl compagnantsi di un rudimentâl strument a cuarde; IL CICLAMIN, LA QUADRIGLIA, LA ROSEANE, IL TRUK (VINCA), danzis che a esistevin intai repertoris dai Grups folcloristics furlans atîfs prime dal ultin conflit mondiâl e aderents ae O.N.D. (Opare Nazionâl dal Dopolavôr)

Altris danzis, di composizion plui resinte, a son stadis ideadis dai stes components coordenâts di Antonella Casco, su musichis componudis di cierts orchestrâi dal grup. Al è chest il câs de PASIONOTE, musicade di Giorgio Miani e dedicade al nestri paîs, LA DANZE DE VIERTE, simpri di Giorgio, in omaç ae Primevere e la STAIARE DI ADELINO, nassude intal estri dal clarinetist Adelino Antoniazzi par agns atîf component dal sodalizi. Un particolâr che al merete di jessi citât al è che lis figurazions di cheste danze nus son stadis insegnadis di un grup di zovins di origjin furlane che a rivin de Australie che a declaravin che cheste coreografie e vignive eseguide dai lôr vielis emigrâts intal gnûf continent tal principi dal 1900. Altre danze dal savôr mitteleuropean e je il SCOTTISH, simpri componude di Giorgio Miani, e di probabile origjine nordiche, ma eseguide in dute la aree mitteleuropeane.

Une des ultimis creazions e je la sugjestive SCHIARAZULA MARAZULA. La particolâr musiche scrite intal 1578 di Giorgio Minerio, mestri di capele dal Domo di Udin, eseguide une vore ben de nestre orchestre, nus à ufiert il sugjeriment par creâ une pantomime che e ricuarde il rituâl di origjin cristian-judaiche: e vignive di fat cjantade e balade ae vilie de Pentecoste par invocâ la ploie. Il professôr Gilberto Pressacco al à volût, daspò vê supervisionât la nestre version, che nô le rapresentassin in ocasion de presentazion dal so libri di ricercje su la danze popolâr furlane dal titul “Sermone, cantu, choreis et marculis” (Societât Filologjiche Furlane,1992).