La Sede

A son trê i agns che a àn viodût l’intîr sodalizi, cun tante costance e fature sedi fisiche che economiche, ocupât inte ristruturazion dal stabil, che si cjate in Vie Muris 40 a Pasian di Prât, che al cjape dentri oltri che la Sede dal Grup stes, ancje il “Centri di documentazion des tradizions popolârs”. Il nestri sodalizi al à cun di plui rindût pussibile la struture ae A.G.F.F Associazion tra i Grups Folcloristics de Regjon Friûl Vignesie Julie che e fâs part) che e podarà doprâle pes sôs riunions, marcant cussì il stret rapuart di amicizie e di colaborazion cun ducj i grups aderents. La felicitât e la sodisfazion pe realizazion e je papabile in ducj i components, che a cjapin la ocasion par ringraciâ dutis lis personis che, dilunc i agns, a àn colaborât pe realizazion di cheste impuartante opare, e il sostegn dât de Regjon Autonome Friûl Vignesie Julie, de Fondazion Crup, e dal Comun di Pasian di Prât, jessint ancje la prime sede di proprietât di un grup folcloristic di dute Italie. La inaugurazion si è davuelte sabide ai 24 di Jugn dal 2006. Al event, oltri ai components in costum, a jerin presints ancje i rapresentants dai grups associâts ae A.G.F.F., i rapresentants des Aministrazions e dai Ents Publics, e dutis lis personis che a àn sostignût il Grup dilunc i agns.

TESTEMONEANCIS STORICHIS SU LA SEDE DAL GRUP FOLCLORISTIC PASIAN DI PRÂT

Par cure di Giorgio e Luigina Miani (ringraciaments a van a Eugenio Leita e a Valentino Rosso)

Di une indagjin fate a mieç di personis anzianis di Pasian di Prât, o sin rivâts a tirâ dongje ciertis notiziis impuartantis su chest lûc che nus permetin di dâi une precise colocazion intal contest storic, sociâl e economic dal nestri paîs.

Intai prins agns dal secul passât il stabil al veve la forme atuâl, ma al jere stât costruît in doi timps dai fradis Leita Secondo e Angelo. Il prin cuarp, cun funzion di laboratori pai marangons, des dimensions di mt. 8 par 16 e al fo tirât sù intal 1922; intal Invier dal 1924/1925, al stabil al vignì metût dongje un altri, identic e des stessis dimensions. Il motôr necessari ae funzionalitât de aziende al jere azionât in maniere esclusive de fuarce idrauliche dal canâl Ledre che, fin cumò, al scor flanc a flanc dal edifici. La fuarce primarie e jere chê che e derivave de turbine che, cuntune schirie di ruedis e cenglis situadis inte aree de costruzion dongje dal canâl, al mantignive in funzion i machinaris, definîts al timp, di sigûr di avanvuardie. Cheste opare e veve stiçade une vore di maravee par vie che la costruzion de turbine stesse e jere avignude cence ridusi o escludi la puartade de aghe dal Ledre. Daspò de crisi mondiâl dal 1929 e la introduzion de famose “cuote 90”, ancje la economie taliane e veve subît lis consecuencis e tantis ditis a falirin. Par logjiche, il Laboratori dal marangon mecanic, ancje se al produseve ancje mobii preziôs lavorâts a intarsis, cassis di muarts (a vignivin comercializadis fin a Vignesie) e a vessin ancjemò une ativitât di tiessidure, e veve subide la stesse sorte.

Intal 1934, l’imobil, clamât ancje “Lavoratori” o “Filandin” al fo cedût ae dite dai Fradis Palma (detentôrs dal plui cognossût mulin za atîf di diviers decenis) e ducj i implants e machinaris pe tiessidure a forin trasferîts li de abitazion dal siôr Secondo in Vie Rome 14, li che la ativitât e cessà ai 31 di Dicembar dal 1969.

Dilunc il periodi di ocupazion todescje il “Lavoratori” e Filandin al fo recuisît des autoritâts militârs ocupantis, destinât a oficine pe riparazion dai avions gjermanics e il lûc, deventât di massime sigurece tant di jessi controlât di vuardiis armadis di dì e di gnot, al jere frecuentât di tecnics aeronautics todescs che a lavoravin dentri in tute blancje.

Cuant che a son rivadis lis trupis aleadis i todescs prime de lôr ritirade, a minarin e a faserin saltâ la part posteriôr dal edifici che, dopo, no fo mai ricostruide; chê anteriôr, invezit, e fo abitazion de famee dal mulinâr Dante Bernardinis, par diviers agns “Dean” di Pasian di Prât cul compit di impiâ il nestri “Pan e Vin de Pifanie”.

La ultime proprietarie Esterina Dreosso, in acuardi cui fîs Roberto e Moreno Mattiussi, e à permetût la vendite dal capanon dongje dal Ledre al Grup Folcloristic Pasian di Prât che al voleve fâlu deventâ, intai agns futûrs, oltri che sede permanente dal sodalizi, pal davuelziment des sôs ativitâts, viodude la bielece dal lûc, une oasi di serenitât e un Centri pe documentazion e la divulgazion des tradizions popolârs di cheste Comunitât.

CEMÛT CHE E JERE LA SEDE – LAVÔRS DI RISTRUTURAZION