Intal principi il Grup si esibive cun costums dai colôrs vivarôs, diferents di chei di cumò cu lis tintis plui semplicis. Intai prins agns dal Grup, i vistîts de femine a jerin di un unic colôr, cun dôs fassis neris inte part plui basse dal vistît e chei dal om di vilût, e a jerin realizâts su la fonde des cartulinis in cumierç in chei timps che a ripuartavin daûr la indicazion “Costums furlans”.

Subit dopo il dramatic taramot dal Friûl dal 1976 si è sintude la esigjence di aprofondî il bagai culturâl dal nestri sodalizi curant la ricercje e la esecuzion des danzis e des musichis; par completâ chest lavôr, no podevin dismenteâ une rivisitazion ancje dal nestri costum, cirint testemoneancis e documentazions par garantî la autenticitât.

O vin volût domandâ jutori a ciertis personalitâts intal mont de ricercje des arts e des tradizions popolârs e, par nestre fortune, o vin podût cjatâ la professore Novella Aurora Cantarutti che, cun zentilece e cun massime disponibilitât, e à contentât la nestre aspirazion seguint di persone la ricercje dal materiâl e il confezionament dai costums e, cjapant come riferiment il volum “Antichi costumi friulani- zona di Cividale” (Udin, Societât Filologjiche Furlane, 1941) di G. Perusini e L. D’Orlandi; jê e à individuât lis zonis di Cividât pal costum de femine, e di Faedis come riferiment pal vistît dal om.

Chest impuartant contribût de eminente personalitât de culture furlane che, tra l’altri e à contribuît a preparâ il Museu des Arts e tradizions Popolârs di Udin, e à fat in mût che tal 1978 e podès rivâ ae presentazion uficiâl dai gnûfs costums ae comunitât pasianese e aes autoritâts rivadis pe ocasion.

Chescj vistîts, doprâts dal popul fin ae fin dal 1800, a son une vore sempliçs sedi inte forme che intes stofis; chel feminin al è costituît di une cjamese di lin, di un vistît di coton a piçui dissens blancs su sfont scûr, une cotule sot pal plui a cuadris di colôrs diferents e doi grumâi, un cu lis rosutis e chel altri di lin blanc ricamât che une volte al vignive doprât pes fiestis. Sul cjâf un façolet blanc cun intarsis e ôrs ricamâts, su lis spalis un di sede di tancj colôrs. Il costum masculin al è costituît di un gjilè e bregons fin tal zenoli di panine scûr, une cjamese di lin e, intes grandis ocasions, un cjapiel neri cun largje ale e scarpis realizadis di pueste.