Il Grup Folcloristic “Pasian di Prât” al è stât fondât tal 1966 di bande di un grup di amîs entusiascj, tra chescj i fradis Giorgio e Roberto Miani e Luigina Degano, ancjemò components dal sodalizi. Giorgio Miani al fo il prin president a vuidâ il sodalizi dal 1966 al 2001; po dopo al rivà Claudio Degano che al fo President dal 2001 al 2014 par rivâ al President atuâl Fausto Di Benedetto.

Cu l’obietîf di mantignî vivis e sverdeâ lis tradizions dal Friûl, tiere de lenghe e peculiaritât unichis, e presentant intai siei spetacui pagjinis vivis e sugjestivis de anime semplice de sô tiere, il Grup al propon cuntun sielt repertori di musichis, danzis e cjants la atmosfere e il senari dal antîc Friûl, intun spetacul une vore preseât pe varietât e pe durade.

Il Grup, intai siei cincuante agns di storie, al à presentât in centenârs di spetacui in Italie, Europe, e oltri Ocean in Canadà, Stâts Unîts e Argjentine, il miôr dal patrimoni folcloristic dal Friûl, in graciis dal impegn di une cuarantine di elements, e di une preseade orchestre.

Al à presentât spetacui sedi su sempliçs “breârs”, palcs di sagris paisanis e sedi su prestigjôs palcs di sene di teatris, al è stât ospit e al à partecipât a tantis trasmissions trasmetudis di televisions nazionâls e locâls, al à colaborât e cjapât part ae realizazion di films, al è stât promotôr e organizadôr di tantis iniziativis tal ambit culturâl locâl. Al à ricevût ricognossiments pe ativitât davuelte, pes diviersis realizazions specifichis e pai costums che al à intor.

Il Grup al à inmaneât inte sô sede tancj Festival folcloristics internazionâi, in ocasion dai siei aniversaris di fondazion e, plui di resint, intal Festival Folklorama, puartant a Pasian di Prât il miôr dal folclôr furlan, talian, european e di oltri ocean. Al è un dai grups fondadôrs de AGFF, Associazion tra i Grups Folcloristics dal Friûl Vignesie Julie.

Cumò il President dal Grup al è Fausto di Benedetto.

Pasian di Prât al è un paîs che si cjate inte perifarie ovest di Udin; si pues rivâ a mieç de autostrade A23, cun jessude “Udine Nord” o “Udine Sud”, e seguint po dopo la tangjenziâl cun jessude par Pasian di Prât.

La sede dal Grup Folcloristic Pasian di Prât e à cheste direzion:

Via Muris 40

33037 Pasian di Prato (UD) – Italia

Tel. +39 0432 663443

Mob. +39 340 7132994

e-mail: info@furlana.it